Jarásti: Tatá Pablo Sebastián Felipe, jiní K'umachini anapu.

Tateecha ka naneecha.
T’eruncheticha, ka iamu ireta.
T’amapu t’eruncheticha ka iamindicha.
Chari sesikua jimbo:

Mieuansparini juchari tua anápuchano. Uekapirink’a kurhámarhikurini, ¿ireta jucháricha ambérusï uaxastaxempi úkurikueechani, nitámakueechani, uarípikueechani, tanhurikueechani, kuinchikueechani, jurámukueechani, uexurinichani, ka iamundi ambe?

Miteskasï eska ireteecha jatsíkurieskasï karárichani enkasï iamindu ambe uaxastamk’a atántaparini sïkuricharu ka kuirúnharikuparini tsakápucharu. Jopert’u nitámakueecha mintinhaxemtitusï k’eri achambasïchani jimbo enkasï uanxástanhank’a irétecharu ka tsimá jindesti aundaricha.

Miteskasït’usï eska tua anapucha miuxenk’a jurieetechani, kutsíchani ka uexurinichani. Ka ist’u miuxemtisï jurietechani enkasï jindeuamk’a tsíri jatsikueecha, ka jurieta pikúskua, jurieta enka úpinha manákuririchani jupieni, p’itámani, o uandikoni.

Miteskasït’u eska tua ireteecha jatsíkuaresk’a orétsikurichani, jukámpitichani, p’urékuchani, ka uandarichani, ka ist’u mamaru ambe úrichani. I jurieteecha enka ixú úkurintani jaka jimpostisï miauantani eska tua anapucha iretecha uaxásïtasïk’a miukuani.

Ini k’eri echeri jimbo jarasïti muikua enka mindakateepk’a tata jurhieta, ka imásï uenaxemti miuini ma jurie jimbo, enka ch’piri unhanmk’a, ka jimá ueratini miunhani kutsicha, enk’asï jindeka temini iumu t’amu kutsicha (18 meses, turhísï jmbó), ka isï antáparateransï ma uexurini, ka isï enka jamberi antanhupinha tsimani ekuatsi ka témbeni tsimani uexurini (52 años, turhísï jmbó), enhk’a arhínhamk’a ma jokurikua, ka menteru jimá unhantani ch’piri jimbaki. Ka isï nitámakurini imecheri irekua.

Kuahátsintani mokuntani kurámarpekuani, ¿nanísï uaxastaxempi juchari tua anápucha imecheri irekuani? O’kasï arhiri eska jarhaska iasï jamperi enkasï arhínhak’a sïkuricha, takusïcha, , ka tsakápucha. Imechani arientani ka kuránkontani kánekuasï exentak’a juchari nitámakuani ka juchari irekuani, juchari echéricheeri ambe, tua anapu jurámutichani, ka juchari surukuani.

Enkasï jucha undak’a kurámukoni táatichani, tatitechani, tatita muuchani o xinhuankueechani, okasï sïrintani sani juchari uecátsimekueechani, ka miteni juchari irékuani ka nitámakuani. Enkasï jucha undaka ambotantani iakatechani juchari iretecharu anapuchani, oakasï exentani santaru tua anápuecheri ambe. Enkasí jucha undaka janhánharintani kaxumbekuani, pamperakuani, ansïperatani, jukámpikuani, anchikurikuani, janhánharip’ekuani, oakasï janhaskantani irekua tua anápuecheerichani ka úni k’uránkuni juchari iasï irekuani.

Isï jimbo uetariti uenani mitentani juchari irékuani, juchari anchikurikueechani, juchari mindakueechani, juchari surukuani, juchari eráteskuani, ka iasï anapu ambechani, kúskakuani, pirekiani ka pindékueechani. Jukáparastisïk’a mitinkunrintasï ka mitentani juchari irekuani, irechekuani ka jurámukuani.