Túnguini jap’indangaspk’a Cheráni iriétaru, chári iriéta sesï jasïsti, kanikua xunhápiti juátecha jukáristiksï, p’ukúrinicha ka anhátapuecha jingoni.

Urápiti ka charhápi tsïtsïkicha jukápistiksï, ¿namúni uéxirhini uspti ía enga túnguini iapíndangspti ía? Chári táati ka náandi ts’ípikuani jingoni túnguini eróntaspti ía, ka ma jurhiáta chári k’umánchikuarhu ts’ípisïrampti ía tatáka sapíchuini kurhóni terékuariparini.

Ka chíti náandi jukári sési kámangarintaspti ka sési arhísptispti túnguini ka imájtu chíti táati túnguini sési uandásïrampti, isïtumindu chiti eráchicha ka mimi jembecha kasïpikuani jingóni kámaspitisïrampitksï ka ch’anásïramptiksï túnguini jingóni.

¡Cheráni, chári iriéta!, ts’írápiti xarénicha jukáritini, ka chúrikuechaksï tsómikuecha joskuechaini jingoni, jurhíatechaksï xuma, iauákuecha, janínts’erakuechani ka tarhiátechani jukárini.

¡Chári k’uirípuecha Cheráni anapu jukári sési kaxípikua jukastiksï, ka jí miantaxaka t’unguini enga jorhénguarispka ma maru ambé Internádurhu indíjenicheri Paráchu anapu. Imá tiempu nintasti ía.
Ka iásï jamberi jukari erats’ikuani jukáskari, ka chá jukári jukáparhaskari juchári P’orhépecha jimbó.

Eránchi sani iótakuarhu ka exé ía joskuechani mere-meréngaripani terújkani churikuarhu ka jarásti ma karákata enga aríjka: TATÁ IRINEO ROJASÏ HERNÁNDESÏ MA K’ERI ACHÁMASÏSTI...

Tatá Irineo: Iámindu juchá P’orhépicha jukári uéksïgajkaksï tunguini ka no ment’ku uarhíaakari juchángsïni jimbó.

¡Juchári mints’ítarhu jauákari mentku isï….!


Karhasti: Tata Mateo Sïuïnani Anapu.
Akámbarhu Uératini. Mayu kuts’í jimbó. 1992 uéxurhini jatíni.
Composición en P'urhépecha del Prof. Mateo Morales Gonzalez.
Escrita el 29 de mayo de 1992 en Acambaro, estado de Guanajuato, México.


-QUE EN EL DÍA DE SU FALLECIMIENTO, MIS HUMILDES PALABRAS LLEGUEN HASTA EL CIELO Y RINDO UN POSTUMO HOMENAJE A MI GRAN AMIGO TATÁ IRINEO Y NO LE DIGO ADIOS SINO. EXEJPERANTAXAKA ORHEPANI ISÏ TATÁ IRINEO