UÉNATARAKUA.

Kaxumbekueri ambe karaska, ka ísï jájkuska eskani na kurhanguka eskaksï uékasinga jurhentpiricha engaksï U.P.N. rhu. Uruapani ánchekorhejka. jini Universidad Pedagogica Nacional
Unidad Morelia, Michoacán, México, arhíkatarhu.

Uandakuechani úraaska engani ji exejka eska no kurhangukorheni jauaka:

• Téxurhistiksï ima uandakuecha engani no sési xéka p’urhe jimbo karani jimboka no úpiringa jánhaskorheni ka ísï jámani nóteru arhinchantskorheni ka jimbo, máteru uandakuarhu kuánperakatestiksï.
• Kuirundurhastiksï ima uandakuecha engani jángorhentani jaka p’urhe jimbo arhini enga ióntki no úranhempka (arini járhaticha: engani karaka eska jurhengua sánhani arhisïnga kánepani; constructivismo arhikuekaxaka.)

Jángorhentaska P’urhe jimbo eratseparini karani. Ka Ch’eranijajtsïkurini (Cheranatzicurin, Cheranastico) anapu P’urhe uandakua úraaka.

T’ápuru arhukuska ini karakatani:

Mápuru: Mítetaraakaksïni ambe engani no úni jápka jánhaskani. Andisïni íni ambe eraku. Ambe engani xáni mintsikani jaka íni kararini. Naniski, ka néna irekorhenhaxaki Ch’eranijajtsïkurini (Ima ireta enga i karakata uandatseaka).

Tsimani arhujtatarhu karaska: Néna aratseski ánchekorheni ka ambe t’auakata jatani jurhentpeni jámani.

Tanimu arhujtatarhu karaska: Ima engani ji sési erangukuajka mítekua, imani mítekutichani engaksï inde ambe niátajka jurhengueri ka kurhangukueri ambe; Tata Jean Piageti ka Tata Lev Vigotsky chúngumatichani ka máteruechani engaksï imani eratsekua kámajka eska jurhengua sánichani kánepasïnga.

ka, T’ámu arhujtatarhu karaska: P’imarhejperakuechani. Ka máteru ambeteru enga marhuauaka sánderu jánhastajpeni íni karakatani.

MA ARHUJTATA. MÍTETARPENI AMBESÏNI NO UNI JAPI JÁNHASKANI.

Jucha jurhentpiricha engachi íni erakuka sapicheri jurhentperakua ánchekorheni, ka tsípekua jingunichi ánchekorhenchani, kurhanguakachi engani ixu uékani jaka karani. Kánekua uandaxekuesti ka mámaru jáxesti, ka k’uanisïndi k’amak’amasï jurhenakuni.

Kaxumbekueri ambe karani jámani, k’uanísïndi jánhaskantani p’urhechachi néna irekorhexaki. Nénachi nitamakorhexaki, ambe ka nénachi jakajkusïni, tumina náxani jatsïkorhenhaski, jiniani sánderu mókuntaaka íni ambe.

Kaxúmbekua uánekua ambesti: Uandajpeni, kurhandini, marhuani, no nánditerkueni jámani, no uinhachani, no nósesi uandani, k’uratsekua kámani, no uanonhaskpeni, no ísku jándi úkorheni, no ámeratpeni, no tandijchpeni ka máteru ambeteru.

No úaka jiájkani iámendu indeni ambe karani uandajpeakuajkueri jurhenguajkuni karaaka. Ka nójtuni úaka uandajperakuerijku karani, jimboka kaxumbekueri ambe karani k’uanisïnga pájtamani eska xáni kaxumbekueri ambe uandaxekueka.

Ma o xánimendu tsimandanijku jukarasïndi táchani márku inchakuecharhu sapicha engaksï kaxumbeka. Imani engani íni uéxurhini (2001-2002) ji jatsiani jaka 6º B májkusï sési uandajpejti jurhentperakuarhu niárataini. Jiminisï uénajtia jucheti no jánhaskakua ka eratsentskua: ¿Nóksï ima sapicha kaxumbiti jaiarajki engaksï sapichutki uénajka jurhendanhani uandajpeni? Ka ji engani jurhentpirika, ¿Andi úa jarhojpeni jurhentperakuarhu jatini jurhentpeni kaxumbeni?

Iásï jamberi (junio 2002) jurhentpirichachi uénasïnga sapichani japarini no uandajperani, ka uanonhaskajperani, ka ikichakueni uandaxeni ka ísku jángua uandaxeta kurhajchataraani sapichani.

Ísï eska máteru iretecharhu, ixujtu íni iretarhu Ch’eranijajtsïkurini sánhani arhixati kaxumbekua xántkueni. Jimbosï uétarheni jati eratsentani: ¿Andi juchachi jurhentpiricha jarhojpexaki imani iretarhu engachi marhuatspeni jaka eska indeni jásï p’urhecheri jurhengua úrakorheaka?

Íni karakatarhu sapicheri kaxumbekua jurhenguani erakuntaska jimbokani ísï erangusïnga eska uánekua ambeska enga uétarheni jaka kaxumbekueri ambe jánhaskantani. No jánhaskakua jiminisï jati: ¿Nénachi jámani jurhentpiricha marhuaua eskaksï sapicha jurhengorheka uandajpeni (kaxumbeni)?

Kurhanguni uétarhexati eska íni jásï uánekua iretecharhu méntkueni jaka, ísï jimbo, uékasïnga eska kurhangunhaka eska íni karakatarhu Ch’erijajtsïkurini (Cheranatzicurin, Cheranastico) anapujkusï uandatseni jaka. Íni iretarhuksï tsimani Primariauecha jarhasti. I karakata jimajku anapuesti primariarhu enga arhinhajka NIÑO ARTILLERO miurakua mítetaranskua jimbo 16DPB0179I jukasti. Imani márku inchakuarhu 6° B. Indeni primariarhu 258 sapicha nirasïndi, Témbeni ka ma jurhentpirichachi ánchekorhesïnga.

Indenijkusïni jángorhentaaka karani néna jurhendaani sapichani kaxumbekua jinguni uandajpeni jurhentperakuarhu.

Kaxumbekua uandantasïndi néna enga jurhendanhani jaka sapi chénjembo, jurhentperakuarhu ka iretarhu.

Íni iretarhu engani uandatseni jaka, janhasti tatachicha (Máruksï jurhentpiristi) engaksï jatirikia ka nóksï uandajpesïndi. ¿Andi indexamu kaxumbekueski? ka máteru kurhangorhexaka: ¿Andi indecheri sapichaksï néna jaiarani jaki?

Juramukuarhuksï acheti sapirhaticha no uandajpesïndi niáratini, achamasïchaniksï no uandajpaasïndi. Indeni jásï jangua jimbosïni eratsentajka eska xántkuexaka kaxumbekua.

Jucha jurhentperakuarhu méntkueni ánchekorhexaka eska nákinderku ma primaria. Arhikuekaxaka eskachi méntkueni ambe jurhendajpexaka (plan y programa nacional 1993) eska máteru jurhendajperakuecha (ka nánditerkueni; no sési úskutini ka níjtu iámu enfoque jinguni eska jima na arhijka).

Tsimani jurhentpirichajkuchi uandaxesïnga p’urhe jimbo, ka no méntkísï, jiájkanijku engachi tsïmarheni uandaxeni jauaka, engachi iámenduecha uandaxeni jarhajka juchájtuni utusï jimbo uandaxesïnga. Jángorhentaxaka p’urhe uandakuani úrani sapichani jinguni, no úxaka xékuntani néna eskaksï sapicha karanhchaaka p’urhe jimbo, sánderuksï utusï jimbo karasïndi. P’urhe uandakueri ambe inchaataska ixu jimboka uandakua kánekua ka uánekua jurhengua pájtamasïga, sánderia kaxumbekuarhu jimboka p’urhe jimbo no úkorhesïnga nósesi uandani.

Jukarasti ma sapi (ma ekuatse ka tanimuestiksï ima engani ji jatsiajka) enga no uandajka p’urhe, k’óru kurhangusïdi iámu ambe, míteska eska uandaxesïnga p’urhe jimbo máteru sapichani jinguni, jíndenisï no uéjti uandaxecheni, engani ji p’urhe jimbo kurhamarhejka ambema, imarini utusï jimbo kurhachesïndi.

Jángorhentsï je eranhaskani néna jándeski jurhentperakuarhu: Témbeni ka ma inchakuecha jarhasti, kánekua kóndesti, sánderku no tsimani tsíri jatsïkueni k’ésti echeri enga jurhendajperakuerika, jurhiata andarakurhu ísï jakusti iretani (Ch’eranijajtsïkurinini.)

ANDI JIMBO UANDAJPERAKUA (KAXUMBEKUA) ERAKUSKI JURHENTPENI.

Kaxumbekua erakuska jimbokani xéxaka eska jucha jurhentpiricha engachi ireta p’urhecharhu ánchekorheni jaka sánderu arhixakachi máteru ambe niátani. Nóchi imani ambe ánchekorhexaka enga úpiringa arhikorheni Educación indígena. Enga ísïpiringa uétarhepirindi eskaksï sapicha kaxumbeni jurhengorheni japiringa: Uandajpeni, ka marhuani, ka kurhandirani ka máteru ambe jurhengua enga xáni p’urheri ambeka.

Jurhentpirichachi p’urhekuani ka p’urheri jurhengua ambe uandakua jimbo xénchani uandasïnga, k’óruchi jánguarhu máteru ambe niátaxaka. P’urhekuanichi jukamutini jámsïnga ka k’óruchi juchari sapichani utusï jimbo uandaxekuasïnga, jurhentperakuarhuchi no purheri uandajperasïnga... ka mámaru ambeteru enga sóntku p’ikuarherakorhejka ka sóntku mítentskorheni eska no p’urheri eratsekueska. Íni ambe jimbosïni arhijka eskachi jurhentpiricha no xénchasïnga p’urhekuani, ka engachi ísï no xénchajka, ¿nénachisï p’urheri jurhengua ambe jurhendajpeaia?

Ixu juchaari iretarhu Ch’erijajtsïkurini, P’urheo, p’urheri jurhengua uétarhexati jimbokaksï k’ératicha úraxaka kaxumbekuani, sapirhatkuechachisï no xénchajka
p’urheri jurhenguani, p’urheri akuani, ka iámu p’urheri irekuani jimbokachi uékasïnga utusïchani ka jámberi gringuechani eranhekua p’itakuani.

Engachi jucha jurhentpiricha no uénaska arhijtsïkuani sapichani kaxumbekueri ambe, sánderu sóntkujtsïni andaati inde ambe enga ísï p’irhikorheni jaka. Jimbosïni ísï erangujka eska marhuauaka sapichani kaxumbekua jurhengohetaraani.

Nósesi xésïnga engachi jurhentpiri p’urhecha kápchakukorhentani jaka tanimu ambejku jurhendaani sapichani: Karani ka arhintani ka miiuni. ¿Nani pakarasïni máteru ambe jurhengua? ¿Nani pakarasïni kaxumbekueri ambe jurhengua?

Kaxumbekua sánderu k’éri jurhenguesti jucha p’urhecheri, ne enga kaxumbeka: chéni jembo ka iretarhu uandajpesïndi ka marhuani, janhanharhpesïndi, kasïkasïsï jámasïndi, no mókukorhesïndi, no nanditerkueni jámasïndi, no chkuandirasïndi, no ísku jándi úkrhesïndi.

“Ne enga jurhenaka kaxumbeni ísï eska imeri k’ératichani jinguni na jurhengorheka, imasï sapi, achamasï ka tumbi k’éri ambeti.”

Ini jurhengorhentskua erakuska jimboka uétarhexaka eskani jucha jurhentpiricha jurhendauaka sapichani eska kaxumbekua sési ambeska. Enga uka, primariarhu kaxumbekueri jurhenguani nótki nema jurhentpexati. Eska xánku sapi chénjembo jurhengorheni jaka xánkusï jurhengorheni jati, ka míntsikaxaka eskachi úaka jurhenguarhu kaxumbekua jurhentpeni.

Íni karakatarhu p’urheni uétarhesïndi sóntku jánhaskatarani ambesïni jángorhentani jaki eskajtsïni jánhaskacheka.

Xésïnga eska marhuasïnga ima ambe jurhentperakua enga juramuticha axajka karakata jimbo (plan y programa 1993. Ka uánekua jurhentpirichaksï karaxati inderi ambe… utusï jimbo…) enga úka, jiminijtu sánku jukanharhisti ima jurhengua enga úpiringa kaxumbekuani jinguni terukutantani.

Kaxumbekua Educacion Cívica junguni terukuntasïndi. Ka noma sïranda arhintskua inderi ambe axanhasïndi. Juramuti arhintskuechani no axaasïndi. Ka indeni programarhu 1993, indeni jurhenguani kachundurhisïsndi. Terceruerirhu ka sextuerirhu nombema jukanharhisti. Máru jurhengua primeru uénasïndi ka terceru ísï nóteru kutuni ka sextu sánderu nóteru ambemaia. Educación Cívica Jinguni eranhaskaxaka ji pájtamani kaxumbekua jurhengua.

ARINI AMBE EROKORHESÏNGA.

Kánekua ka k’éri mintsikaxaka:

• Eskaksï sapicha jurhengorheaka uandajpeni (kaxumbeni).

Sapirhati mintsïkuecha engaksï pájtamakueka:

• Eskaksï sapicha jánhaskaaka ambeski uandajpeni.

• Eskaksï sapicha uandajperaaka.

• Eskaksï sapicha jurhengorheaka chénjembo ka iretarhu uandajpeni.


NANISKI KA NÉNA IREKORHENHAXAKI CH’ERANIJAJTSÏKURINI.

Nani jarhaski ireta:

Ch’eranijajtsïkurini imani xanhari jimbo jarhasti enga Karhapani uératini P’arhachu niárajka, ka jurhiata inchajtsïkuni ísï jakusti Ch’eranini, ka karhamani ísï jakusti P’arhachuni, ka k’úmstarhu ma umbajtsïkusti.

Karhapani uératini ma ekuatse kilometruesti. Úsïndi xanharakorhepani niárani, Arantsani uératini, iúmu kilometrujkuesti.

Arini iretecheri echeri jinguni píngurhitixati: Tanaku, Ch’erani, Arantsani, Jauirani, Ureni ka P’arhachu. (Kúndakua exeni 1 ka 2 exe pag. 50 rhu ka 51rhu)

Néna arhikuekasïni ireteri jakangurhikua:

“Jángorhentaskachi eranhaskantani jimboka karakata engani xéntaka imesti engaksï Españolicha janopkia enga imani karakatarhu jataka enga arhinhajka La conquista de Michoacán 1521—1530 imani enga Uarren karantaka pp. 406 ka arisï arhisïndi: Ini jurhiaatekuachi niáraska ireta sapichurhu ma enga arhinhajka Cheranazkon, Araxa (Aranza) jinguni jarhasti, uandastinha eska jatsïaaska k’umanchekuechani. Uaxastakata jarhasti juata sapichu patsïndsïrhu ma enga arhinhajka Chiran. Itsïmasïndiksï iurhekua sapichurhu enga arhinhajka Condiro no iauani jakuaasti. Témbeni ka iúmu k’umanchekuechajkuksïsï jati.”

Ísï jámani jánhaskasïnga eska Ch’eri Jajtsïkurini Ch’erirhu arhikuekaxaka ka eska karhakua uaxastakata jarhaska. Ch’erijatsïkurini arhinhasïndi, ísï mítenhasti ka ísïchi arhisïnga iámendu ireta p’urhecha ka jíjtuni ísï sánderu úraaka íni karakatarhu.

Káni uénaspi jima irekorhenhani enga iásï janhaka:

Archivo de la Nacionirhu anapu sïrandarhu ka máteru ambe uandantskua jimbo ísï kurhagukorhesti eska ireta sánhani ka tachani ireukarhenhaxapka. K’óru eskaksï méntkueni p’urhe uandaxesïrempka. Arisï etsakurhinhatixapti: K’úmstarhu jurhiata andarakuarhu ísï iasï anapu iretarhu, karhasï terirhu k’úmstarhu no iauani sáni Arantsani ísï eraparini; Tsïntsïkatarhu kétsemani ísï, Tamapu juata jurhiata inchajtsïkukuarhu ísï. Jakajkukorhesti eskaksï nótki janoempka españolicha enga t’uini i iretepkia jimbokaksï uandasïnga ixu anapu Irechecha Ghamondange ka Jarame:

“Uska ji brecha (107) Ghamondange ka irecha Jarame íni titulo orijinal, tsïrimekua jimbo, mil i kinientos y dies y nuebe años jimbo iski na uandanhaponguenga t’antsïraparini echeri eskani xáni míngorheska echeri jinguni...Ka ji’tuni uska iakata, Tamapu juata ja’tsïkurinika xáni mingorheska, echeri,eskani xanit’antsïraka íni titulo – jimbo ka ji xachokorheska santo jaka’kukua, eka inchanhoka, Tsïntsuntsan íni uexurhíni jimbo – 1522...”

Jánhaskorhesti eska Ghamondange ka Jarame t’uini kámasïrenguia juramukua ixu anapuechani jinguni. Jimbo no úkorhesti sési uandantani na jatinichi uénaski márku irekorheni Ch’eranijajtsïkurinicha.

Néna nitamakorhenhasïni:

Ióntki uénani mítekata jarhasti eska tsiri jatsirinhaska (ísïchi jatsïkutarkorheska tsakapuni enga mínda kánhajka jimbanhe uéxurhinirhu p’urhecheri). Ixu uanondani iretechani jinguni terukutani, íni iretarhuchi sánderu echeri tsiri jatsïkua kángorhesïnga. Tanimu k’érati echericha: Ureni, Irhapio, Pákua, ka uánekuateru uéramanicha enga sánhani arhini jaka echeri ambakeranhani.

Ísï xarharasïndi enajki nónema uétarhenchajki, k’óru sánderku no iámendu familiauecharhu tsimani o tanimu norte jánhaxati ánchekorhetspenhani, sánhani arhixatiksï nanecha ka sapichajtu pájtanhani.
Ísï jiniani nikua jurhentperakuarhu xarhantasïndi jimbokaksï amambechajku nirasïnga jurhentperakuarhu sapicheri ambe míteni.

Norte ánchekorheta mámaru ambe juáxati iretarhu: Tumina enga ánchekorheta intsaani jaka enga ixujku janhaka, sánderu sáni albañilichani ka kustatichani. Jiniani ánchekorherichaksï sánderu kánekua tumina inchataxati. Enga úka, p’indekuechantuksï júaxati enga marhuani jaka juchaari sapichani p’irhikukuani xukutakua, ka akua, ka uarhakua, ka kústakua, ka ch’anakua, ka kaxumbekuanichkamendia.

Ambendi u, engaksï máru jiniani k’uanhatsentatiniksï nóteru uéjka p’urhe uandani, ka jamberiksï máru p’urhekuani ikimchasïndiksï.

Íni iretarhuchi tsimani ekuatse jurhentpirini ánchekorhesïnga, kuímu ekuatse ka sáni jukariksï kustatisti, t’ámuksï tsinajperakuarhu ánchekorhesïndi, t’ámuksï takusï ka kápandukua p’ípatisti, tsimaniksï tekaristi, tsimaniksï kéretanskua ambe p’ípatisti engaksï Zamora p’ípajka, ma herreruesti, t’ámuksï móskpeni jámasïndi P’arhachu jámberi uirhijpetarakuechani jimbo, t’ámuksï Arantsani nirasïndi ánchekorhetspeni, ma ekuatseterkuesti engaksï kámani jaka tsiri jatsïkuani imechani jinguni engaksï traktorichani jinguni ánchekorhejka.

Jimajkani engachi 450 tatachicheka (tembuchaticha), miuntaxaka eska jukari terujkani uérakua jánhaxaka: 250 ísï. Miuntaparini engachi ixujku nitamakorheni jaka jucha no jámberi 200ska tatecha.

Inde norte nikua jurhenguarhu xarhantasïndi, sapichaksï mískurhesïndi tatjembani jirinhantani nóksï méntkueni jurhengorhesïndi, sóntku xarharasïndi terukutantaparini imani sapi jinguni enga amamba ka tatjemba jatsïkorheka imani jinguni terukutaparini enga jandiojku nitsïkurheni jaka jurhentperakuarhu. Támu, ima sapicha engaksï tátjembani, amambani o tsïmarheni norte kaani jaka, nóksï ambema atini niárasïndi ka tuminaksï uánhachani kámasïndi (tsimani sapichaksï íni uéxurhini Mándani pauani $200.00 pésuchani jámberi pásïrempti atarakorheni).

Exeparini, uandaxeparini ka kurhamarhpeparini arini uandakuani kúska:

“—...Ji arhijka eskaksï ima sánderu sési jurhendakorhexaka sapichani engaksï axu káani jaka sapichani jupijtaatini. Exetkiria: ¿Náki tata Octavianu uájpa o nimakua jemba no kaxumbeski? iámenduksï sési uandajpesïndi, ka ima k’óru t’arhexerakorheasti”... Ísï uandasti tata Abrahami Custodio engani ji kurhamarhepka ne o néksï sánderu kaxumbeski íni ireterhu.

Indeni uéxurhinichani 2000-2001 Témbeni ka iúmu sapichaksï pájtanhasti norte juchaari jurhentperakuarhu petanskatecha, terujkani uéxurhini jurhengueriksï (eneruni ka febreruni) petanhantasti jiniani pájtanhani. Enga úka, k’uanhatsentaxatiksïa máru, jucha jatsïaxaka iúmu sapichani engaksï jiniani junguarikia, máteru jiminisï jatia engaksï jiniani junguaricha no iámu újka uandaxeni p’urhe, urhetaksï ts’unhapekua jimbo jurhengorhesïndi p’urhe uandani ka tátsekuaksï uénasïndi ch’anani iámendu sapichani jinguni.

Náki uandakua úranhasïni.

P’urhe jimbo uandaxenhasïndi, k’óruksï jukarasti márku inchakuecharhu tsimani ka nani tanimu sapicha engaksï no uandajka p’urhe. Nóksï uandasïndi k’óruksï eratsekua p’urhe jimbo juásïndi, íksï sapicha imesti engaksï Arzolecha uájpeka (Arzolechaksï imesti Témbeni ka kuimu familiauecha engaksï ióni ísï no uandaka p’urhe jimbo). Máteruksï jukarasti sapicha engaksï no uéjka p’urhe uandani, indeksï, jurhentpiri p’urhe uájpesti. Sánderuksï uánesti sapicha engaksï p’urhe uandajka.

Eranguntskuesti ka eratsenskueni sánderu néna enga manakorhejka íni iretarhu p’urhe uandakua, jimbokaksï primariarhu uéntani jámani ima sapicha jámberi p’urhe uandani jarhasïnguia engaksï no sáni uandenga p’urhe. Sóntku eratsentaparini jánhaskorhesti eskaksï márku ch’anaparinisï jurhengorhejka.

Tsimani tatachichajkujtsïni arhisti iasï jámberi engaksï no uéjka eskaksï sapichani p’urhe jimbo uandaxekuauaka jurhentperakuarhu. Ma imesti enga ireta k’érirhu nirajka ánchekorheni ka uandasïndi eska no úni jarhasïnga uandapekorheni utusï jimbo, ka jimbonhasï uéjti eska sapi jurhendamenhaaka sési utusï uandani ka eska p’urhe jurhenaskia. Máteru imesti enga imeri mimi jemba univesidarhu jámani jakaia Morelia ka nónha úxati sési petakuni ka imanha p’urhe uandakuani arhiparhatasïndi eskanha imasï no sési úkuni jaka enga ísï p’urhe jimbo uandaxemenhapka primariarhu.

Sapichaksï jurhentperakuarhu p’urhe jimbo uandaxetsperasïndi ka jurhentpirichaniksï utusï jimbo uandaxekuasïndi. Jurhentpirichachi sánderu utusï úrasïnga iámendu ambe uandaxeni jámani.

Indeni ambe xéparinisïni ísï arhijka eskachi jucha jurhentpiricha nóteru xénchasïnga p’urhekuani jimbokachi no uékasïnga iámendu ambe p’urhe jimbo uandaxetsperani jucha uénani. ¿P’indekueia? o jauani jimbokani jucha iúmu jurhentpiricha jángorhentaxaka eskachi iasï k’óru uandaxeakia p’urhe ka nóchi míamasïnga ka t’uinichi ménderu arhinhaskperani jarhasïnga utusï jimbo.

Mintsikaxaka eskarini i karakata marhuacheaka eskani sánderu p’urhe uandaaka jurhentperakuarhu jimbokanha nombema úsïnga jurhengorheni enga no imani uansakua úraaka enga sapi uandajka.

Sapicheri amambechaksï p’urhe uandasïndi, ka p’urhe jimboksï uandaxekusïndi jurhentpirini náuejki jurhentpiri no kurhanguni. Noma nanachini kurhajchaxaka enga no uékajka eska sapi p’urhe jimbo uandaxemenhaaka, jámberiksï uandasïndi eskaksï sési erangusïnga engaksï jurhentpiricha p’urhe jimbo uandaxekuauajka uájpechani. K’óruksï uandakorhesïndi eskachi jurhendauaka sapichani utusïjtu uandani ka karani.

Enga tángorhekua úkorheni jarhajka juchari jurhendperakuarhu tatechaksï sáno iámendu p’urhe jimbo uandaxesïndi, jiminijtuksï Arzolechajkusï no úrajti p’urheni.

Jakajkukua:

Íni iretarhu cristianuekua jakajkunhasïndi, sánderu uani katolikuenhasti, máru familia Evengelistenhasti ka máteru tanimu márkuecha Testigo de Geovestiksï.

Indeni kungorhekua jakajkukueri jinguni ireta chúngumaxati ióni anapu jakajkukuani jinguni. Ísï arhisïnga jimboka uánekua sántuecha jakajkumenhasïnga ka inde imesti útasï engachi jucha p’urhecha ísï jakajkujka: ¿o jakajkuemka?... tata ka nana kuerajpirini, arhikuekaxamka: Nana kutsïni, tata jurhiatani, tata janikuani, echerini ka inderi uájpechani. Tata janikuanichi Tata Sajuanueni ónharhisïnga chuinchekua úkuni. Ísï jámani p’indekua útasï úrakorhexati, jámasïndiksï no sési xéni ima engaksï no katolicoeka ka péreka inde k’óru xerexaka juchaari ióntki anapu jakajkukuani, k’óru no xáni, jimbokaksï imajtu nirasïnga xérkorheni, k’arhorekorhentasïndiksï ka indeni jásï niátakua ióntki anapu jakajkukuarhu jatanhentasïndi.

Inde jakajkukua jurhentperakuarhu xarhantasïndi engaksï tanimu sapicha no uéjka janhanharhini, pirekuni ka kaxumbekuni banderani. Tatjembecheri kungorhekua jakajkukueri jimboksï no jiáretanhasïndi máteru ambeni k’éri ambe arhini.

Engaksï sapicha mítejka eskaksï máteru jásï kúngorhekua jakajkukuarhu jámasïnga, ménkuksï arhiraani jarhasïndi ka nóksï uambeasïndi márku ch’anani.

Namoni sïranda arhirinhaski ka nani jurhengorhenhaxaki sánderu:

Mándani uéxurhiniksï primariecharhu uentaxati sánderku no t’ámu ekuatse iurhitskiricha ka tumbi sapirahaticha, ma ekuatseni ísïksï Aranzani nirasïndi sánderu jurhengua p’irani ka tsimani ekuatse ísïksï ixu anapu Telesecundariarhu inchasïndi ka máteruksï jiniani nirasïndi, indeni tsimani ekuatse engaksï ixujku inchajka nóksï jámberi terujkani k’amarasïndi, t’uiniksï iurhitskiricha uambuchasïndia ka tumbi sapirhatichaksï jiniani nirasïndi no k’amarhukutini secundaria.

Jarhastiksï tanimu tatecha engaksï kánerani jaka jurhenguani, ma mestría intsïnhastia ka tsimaniteruksï k’amaraxati.

Témbeni ísïchi jangurhentaxaka eskachi intsïnhaaka licenciaduekua, ka t’ámuksï p’itixatia licenciaduekua ka máteruksï témbeni ísïsti engaksï carta de pasante kámani jaka.

Tsimani ekuatse tatecha ka nanechestiksï engaksï no jurhenaka karani ka arhintani.

Tata jefeni tocadiscurhu kurhaaska eska jucha engachinha jurhendi arhikorhejka, juchanhani sánderu no andaparhakuentasïnga iretani marhuakuni, enganha ireteri jarhojpekua jarhajka sïranda arhirichachinha sánderu no jarhojpesïnga. ¡Nóchinha kaxumbeska!

Uandaspti ma jurhia tata jefe ixu anapu Anselmo Campusï tocadiscurhu:

“—Tsimani jurhentpiri uájpechaksï sapicha sánderu no kaxumbesti. Ima sapicha engaksï sïranda arhiri ma uájpeka imaksï sánderu mókukorhesïndi ka nóksï uékasïndi marhuani iretarhu,... kuantimasïchkia chéni jembao…”

Juramukua:

Jefechaksï tángorhekua jimbo erakunhantasïndi ka Mándani uéxurhiniksï mojtsïnhantasïndi jiákjani enga jimbanhe uéxurhini jatantajka, ma k’érikuarhu pakarasïndi ka máteru suplentesïndi, indeksï kuajkutajpesïndi enga arhirajperata ambe jarhajka jimbokaksï inde sánderu p’erarhekorhetixaka (iásï jamberi jimboka iónki no ísïspka) presidencia municipalini jinguni.

Támu jarhasïndi comisariado de bienes comunales, inderi jimbo pakaratini jarhasïndi juatecha, itsï, echericha, ka iámendu ireteri kánguarhakua. Tióstarhu jándichajtuksï tamu jatsïkorhesti juramukua.

Nirajtia témbeni uéxurhini ísï enga nóteru nema ónhanhajka, k’ataperakua ísterku jarahasti. Ísï eranguerasïnga ji eska chérhejperanhasïnga, eskaksï juramuticha chérheasïnga tumina jatsirichani, ka sïranda arhirichani. Jimboka juchájtuni jukaraska jurhengorheri arhikorhecha engachi basura jima pérajka enga no sési xarharajka ka nonemajtsïni ambe arhisïndi níjtuchi ambema úmenhajki. P’irhikorhexati juramukua, enga sánderu k’éri ambe no sési úkorhejka, ménkuksï judicialini o policia municipalini uandajpasïndi ka juchari ióntki anapu juramukua nóteru úrakorhesïndi.

Kaxumbekua tembuchakuarhu:

Ménderu uéntaaka karani eska kaxumbekua uandajperakua jimbo xarharasïnga, sapicha engaksï sési uandajka imaksï sánderu sóntku kaxumbeati.

Tembuchani jámani, tata padrinouesïrendi kaxumbekua jurhengua, jimboka jima k’amarasïrempka ma jurhengorheni néna sési uandajpeni, marhuani, no uanonhaskpeni ka iámu kaxumbekua.

Exesïnga eska kaxumbekua nóteru sési andangutanhaxaka tembuchani jámani, t’ámu ambe jimbo: Nóteru tinguixustajperanhasïndi uandajpeni jámani; Nóteru ióni jatsïjperanhasïndi padrinoo; Nóteru k’amak’amasï arhistatsperanhasïndi néna uandajpeni; Nóteruksï uinhamarhenhasïndi tembuchecha niátataranhani. Inde ambe jindesïndi k’amarani jurhengorheni kaxumbeni.

T’irekua:

Andaperani ísïchi kámberasïnga utusïcheri t’irekua inchatani iretarhu. Sánderku no iámenduecha echuskuta mákina jimbo úkata anhasïndia, témbeni tanimu uéxurhinistia enga inchaakuka echuskuta úratarakua, máteru jiniani uéxurhini juánhasti. Ísï jimbo, sánderkuestiksï uáchecha ka iurhitskiricha engaksï jurhenaka echuskuni.

K’uratsenhasïndi uandanhantani eska anhejchanhasïnga atapakua, k’óru iápuru anhasïndi ka áspemuntasïngachi ka no atapakuajku, arhasïngachi kamata, ch’apata, k’urhunda, uchepu, mámaru jásï terekua, mámaru jásï xakua, taiapiti ka mámaru ambeteru.

TSIMANI ARHUJTATA. T’AUAKATA KURHANGUKUKUERI.

Urheta karaaka ambe kurhangusïni ka néna jánhaskasïni máru uandakuechani:

Máesti jurhenakuni néna ka náki t’auakata jatani enga no sáni uénhekuejka jurhentpeni jámani. Ka máteruesti mítekuni néna jurhentpeni. Ka indeni jásï jurhentperakua engani p’erarheni jaka enga jurhengua kánepajaka no jarhasti ma xánhari sésimendu úskukata:

“No cremos que exista una metodología didáctica constructivista; lo que hay es una didáctica general de naturaleza constructivista que se rige por el principio de ajuste de la ayuda pedagógica y que puede concretarse en múltiple metodologías didáctica particulares según el caso. En ocaciones, el ajuste de la ayuda pedagógica se logrará proporcionando al alumno una información organizada y estructurada: en otras, ofreciendole modelos de accion a imitar; en otras aún, permitiendole que elija y desarrolle de forma totalmente autónoma unas determinadas actividades de aprendizaje”.

Úskuni uétarhesïndi ka míteni ambe jurhentpeni ma uéxurhini jurhengueri jimbo, sési etsakuani jurhenguechani kutsï jimbo, ma semana ka Mándani pauani, ka úskutini jarhani ambe úni enga ambema no sési uéraska.

Engachi sési miuntaska jurhiauechani enga calendario escolari arhijka, no jamberichi terujkani ánchekorhexaka. Mámaru ambe japasïndi engachi 100 jurhia isïjku arhiraajka sapichani. Enga xáni ma eratsetini jarhajka jurhentpeni ma semana jimbo ka máteru ambe úni k’uanini, uétarhesïndi sési úskutini jatsini nena jámani eskaksï sapicha no pakaraaka ka jimini marhuasïndi enga sési etsakuatini jauaka jurhenguechani. Sánderu sésisïndi enga no uánekua jurhenguechani erakuaka ma uéxurhini jimbo, ka uétarhesïndi imani erakuni enga úaka pájtamani iámendu járhati jurhenguechani, ka eska p’urhekua jiguni uénaaka.

¿Ka nani pakaraia máteru jurhenguecha enga Plan y Programa 1993 arhijka? ¿Nóksï uétarhencha sapicha? Uétarhenchaatiksï, jimbosï sési erakuntskueti ambe jurhentpeni enga úaka iámendu jásï jurhenguani pájtamani. Sánderuksï nómbe ma úsïndi sési jurhengorheni sapicha enga uánekua ambe uékaka jurhendaani.

Májku t’auakata jatani ka no uenheni. Indesï jindetia sési mítekuni nena jurhentpeni, jimboka no úkorhesïnga jurhentpeni enga ísku mámaru ts’éjkuni jauaka ka úmandku nóma t’auakata jurhendajpekueri jatani.

Enga mámaru jarhati t’auakata jatajka jurhentpeni jámani ískuesïndia jimboka sóntku tsînchekorhesïnga, ka no jamberi mítekorhesïndi ambe jurhentpeni. Ísku jurhentpeni nóma jurhengueri mítekutiri eratsekuani arhintatini sóntku tsînchekorhesïndi ka nóteru jamberi jánhaskorhesïndi ambe úni.

Engachi ísku ánchekorheska noma t’auakata jatani jurhentpeni jámani nómenduchi úaka jurhentpeni.

Májku t’auakata jatani uétarhesïndi jimajkani eskachi sési úskutini niáraaka jurhentperakuarhu, no sési jarhasti eskachi ísku újtsïkorhepaaka o jurhengueachani p’índurhipaani.

Imani karaakia engachi no únchajka ka enga uétarhejkamendu: Mándani pauani karani ambechisï jurhendaua ma jurhiatekua jimbo sapichani. Indeni karakatarhu xarharasïndi náki t’auakata jurhendajperakuerichi úraxaki ka nénachi ústatixaki jurhiatani ka nénachi janhaskantapaxaki ka Náxaniksï jurhenaxaki sapicha ka ambechi úrasïni jurhentpeni jámani ka jamberi náxani tumina úrakorhesïni ka néna exentani ka eranguntani jurhenguani.

Nójtu sésisti eskachi pauandekua anapujku karaaka jimboka ísï niántasïnga eska p’índurhini jarhani.

Eskajtsï na jánhaskani jaka jurhentpeni mítekuni no arisku ambesti, uétarhesïndi míteni néna uandaxeni ka néna anhaxurhini ka néna tsípeni ka néna ikiani ka mítekuni néna káani sapichani engaksï úndaaka kuatantani.

Engachi no mítekuaka jurhentpeni ka úmantkuchi juchari uandanheata juchenio anapu sapichani xarhatakuani sánderuksï no ambema jurhengorhesïndi sapicha. Ísï jimbo náuejki ma pirajchakorheni uékani jarhani, no sési jarhasti jurhenguarhu xarhatani juchari uandanheatechani. Sapichajtuksï támu pákorhesïndi jurhenguarhu imecheri p’ikorhenhekua ka juchachi jatsiska kurhambeani ambeksï p’ikorheraxaki, ka no jima kújchakuraani juchari uandanheata ambe.

Jimbosï uétarhejti mítekuni sapicheri ch’ananchakua, mítekuni ambeksï únchasïni engaksï no míamaaka ka eskaksïmenduksï tsípekua jinguni ninhejchaaka jurhentperakuarhu.

Ísï ánchekorheni uénekua ka mámaru járhati úratakua uétarhesïndi ka juchachi nótki mítekusïnga néna ka na jarhati úratakua úani engajtsïni jarhuatapiringa jurhendajpetarani. Nójtuchi jurhenaska úraani. Piámenhasïngachi ka ískuchi tsítaasïnga ka ménderuenichi ch’anarani. Kurhangorhexaka: ¿Andichisï no jurhena ch’anaratakua jurhengorhetarakua úani ka úrani? Inde ambejtu jima niántasïndi engachi no miuka majku t’auakata jatani jurhentpeni jámani. Ka támu, sóntkuchi uandakorhesïnga eska tumina no andangusïnga ka eskachi jimbosï no piájka ch’anaratakua jurhendpetarakua o ch’anaratakua jurhendpetarakua úrakua ka eskachi no andajkorhesïnga.

No andajkorheni, ka no mítekuni chanarakua jurhendpetarakua úani ka úraani, arhikuekasïndi eskachi nómbema úxaka jurhentpeni, eskachi sapichani ísku patsatspeani jamaxaka.

Arhintaparini, sánhani arhixaka xénchani imani eratsekua enga arhijka eskaksï sapicha uadaxetsperaparini sánderu jurhengorhesïnga ka jurhengorhekorheni máteru sándeu jurhendichani kurhamarheaparini ka uandaxekuaparini.

Sapichaksï no úsïndi ísku jatini jurhengorhekaurheni enga jurarkuauaka. Ísï ánchekorheni eska na eratsekueka íni karakatarhu sánderu uétarhesïndi sapichani eranguani jarhani ka p’ínguani jarhani ka uandaraani jarhani. Sapichaksï p’íjtsamasïndi enga “nombema” úrauaka. Enga sapi jiaretanhajka eska mintsiraaka ka eska uandaxeaka ne enga jinguni sési p’ikorherajka jimini uenasïndi jurhengua. Engaksï sapicha uandaxetsperanchajka, uékasïndijtuksï máteruni arhistakuni ambe enga ima jurhenakia ka imajtu máteru jiaretakorhesïndi eska jurhendanhaaka.

Engaksï sapicha úakia jarhojperani jurhendajperani, ambe uejki, na uéjki sapichu ambeni jurhengua k’éri ambestia jimboakaksï sapicha imani jurhenguanisï pakatakorhejka.

Jánhaskorhexati eskachi iámenduecha úsïnga méni jurhengorherini ka meni jurhentpirini ka indeni jásï eratsekua jurhendajperakueri úrani jiajkani kurhangukuesti eska no ménku ísï jurhentpiri jurhendajpeaka, eska jurhentpirijtu jurhengorheriuaka. Ísi jásï jurhentperakua no terukuntasïndi imani eratsekua jinguni eska jurhenpirijkusï iámendu ambe míteka ka eska jurhentpirijkusï úaka eratseni enga únhaka jurhengorheni jámani. Eratsenskuesti, inchajtsïni eskajtsïni sapichajtu jurhendaaka.

Uandaxetaraani uétarhesïndi sapichani, k’óru no arisku ambesti, úkua jukasti eskaksï sapicha jurhengorheaka jurhengorhekorheni. No ménku ísi níjtu sóntku újki sapichani uandaxetaraani, k’óru enga na újkia erokorhekuesti no inchatakuani jimboka jimasï úkorheni jarhajka jurhengua. Engaksï ménku úndaaka ambema no terukutani ka úndaniksï uinhamu arhistatsperani, jimamendu uénasïndi sapicheri kurhangukua manakorheni, sóndi xerekorheni ka ménderu sési niántani.

“Si bien de acuerdo con la teoría piagetana y post-piagetana el conflicto se consideraría el mecanismo mas importante del desarrollo cognitivo, la colaboaración sería un descriptor correcto para el mecanismo de desarrollo propuesto por Vygotsky”.

Sési jarhasti erokorheni engaksï jameberi úndaakia ima xánku janhaskani, kurhangorhekorhesïndiksïa, ka kurhajkorhesïndiksï eska jurhentpiri jarhuatauaka jánhastani o eska aianguauaka nani arhintani imeri ambe engaksï sapicha uandaxeni jauaka.

“Si concebimos la construcción del conocimiento que subyace al aprendizaje escolar como un proceso, entonces la ayuda pedagógica mediante el cual el profesor ayuda al alumno a construir significados y a atribuir sentido a lo que aprende ha de concebirse también como un proceso”. “En definitiva, podriamos decir que el problema de fondo con el que nos enfrentamos no es tanto, o no es solo, comprender mejor como los alumnos construyen el conocimiento, sino comprender mejor como los profesores pueden influir mejor sobre este proceso de construcción, facilitarlo y encauzarlo hacia el aprendizaje de unos contenidos determinados”.

Jimasï jarhajtia eskachi jurhentpiricha mítetini jauaka imani jurhenguani ka úni sési aiangauani ambe engaksï sapicha kurhangorheaka.

Sánhani arhixaka kurhanguni eska jurhengua nóteru ísïskia eska ióntki, ka jángorhentaska ísï jarhuataani sapichani jurhengorheni.

Na enga ukorhejka ka na enga kánejka jurhengua:

Engachi jucha sapirini uénajka jurhengorheni, sánhani arhisïngachi kánerapani jurhenguani. Indeni jurhenguani Colli sánderu sési mítekutixati:

“Cesar Coll Salvador discípulo de Jean Piget, ha desarrollado de un modo consecuente y parsimonioso los principios derivados de la Epistemología Genética y los ha aplicado a la educación sin la pretención de resolver —por derivaciones simplistas— el complejo proceso educativo”. “En este sentido, los avances que va teniendo la Pedagogía constructivista han sido realizados con base en el planteamiento de interrogantes, una venidas (sic) de la investigación básica pero la mayoría provenientes de la propia práctica educativa. Es decir en un espiritu decididamente constructivo, Coll mas que negar o contraponer los hallazgos encontrados a través de las aproximaciones teóricas y metodológicas, las interpreta e integra dentro del camino de la construcción, y antes de presentar soluciones a los problemas cotidianos del proceso educativo, vuelve a presentar interrogantes que paulatinamente van construyendo nuevos saberes a partir de lo que se ha establecido como conocimiento común”.

Imani eratsekua chúxapani enga arhijka eska jurhengua kánepasïnga uétarhesïndi jucha jurhentpiricha uénani inchajtsïni ka ísï mintsikaparini ánchekorheni, no erokorheni eska ma jurhiatekua jimbojku iámu jurhengua sési pakaraaka.

Eranhaska je: Nóchi úaka urheta uiriani jurhengorheni engachi nótki jurhengarheni jauka xanharani; jurhengueri atatskorhekua uétarhesïndi.

Táchanichi jurhengorhesïnga, jimbokachi japinatinku táchani intsïnhaska eratsekua, ka ima eratsekuajtsïni marhuachesïndi inchajtsïtarani máteru ambe engajtsïni xáni janocheaka ka eskachi xáni úkorhenchaaka ka mámaru jásï jurhenguateru.

Vygotsky uandasïndi eska jurhengua ka uandakua ka k’ekua ka márku irekuaksï méntkueni kánepasïnga:

“Los procesos de progreso mental dependen de los contextos y de las influencias sociales… Necesitamos concentrarnos en los procesos a través de los cuales se establecen las formas superiores y no en el producto del desarrollo”.

Juchari sapichaksï no utusïcheri jurhengua uandaxenchani jarhasïndi enga libruecharhu jukanharhijka, (libru enga juramukua axajka) eranhaskatkiru je: Sapichaksï kánekua tsípeni jarhasïndi k’uinchekuechani eroantani ka jurhentpiri inchandimentani jarhani eska sapi utusïri sintaxisi ka morfología jurhengorheaka.

“Vygotsky entendía el desarrollo mental como un resultado del contacto con las influencias sociales: una transformación unidireccional. El desarrollo natural del niño está profundamente realacionado con las fuerzas socio—históricas—culturales”.

Sapichaksï máteru jurhengueri pitsekua kámani jarhasïndi ka juchachi máteru jurhengua inchandimeni jarhani jurhendaani. Sánderu sésipirindi eskaksï sapicha jandiojku jánhaskakorhepiringa ka tsípekua jinguniksï jurhengorhekorheni ambenga marhuakuauaka.

Imani eratsekua jurhegueri chuxapaxaka enga arhijka eska no úsïnga jurhengorhenhani sánderu enga no urheta jurhengueri pítsekuani sési jókuni uétarhesïnga ka tátsekua sánderu jurhenguani jima kujtsïtapani.
“En primer término, destaca la concepción que tiene la corriente acerca del alumno y del profesor. Se concibe al alumno como responsable y constructor de su propio aprendizaje y al profesor como un coordinador y guía del aprendizaje del alumno”.

Ixu uératini nirasïnga uandantani néna engani jurhendaaka sapichani engaksï 6º B jápka imani jurhentperakuarhu engachi ixu uandatseni jaka, ma ekuatse ka tanimuesptiksï jucheti jurhengorhericha, ka tsimaniksï no uandasïndi p’urhe ka iámenduksï márku iretarhu anapuesti. Imankusïni karantaaka engani xáni kaxumbekueri ambe jurhendajpeka (sánderu sani jurhiata máteru ambe jurhendajpeska). Iámendu jurhenguarhu, enga xáni úenga, pájtamasïrempka kaxumbekueri, sapirhati inchatasïrempka.

UANDAXEKUA: KAXUMBEKUA.

• Ma uenani jámani ukua: Terukutani 6º B eri janguechani
• Mintsikaxaka: Eskaksï sapicha jánhaskaaka kaxumbekua.
• Arini ambechi úspka :

Urhetachi uandaxespka ambe sánderu sóntku uétarhexapi juchari marku inchakuarhu. Sapichaksï no uékasïrendi uandaxeni.

Arhiaska:

— “ju je uandaxeni ambe uétarhexaki uni íni salonirhu”

Sánhani arhistiksï míntsirani, engaksï uandani jarhenga ichajpatatsperasirendiksï ka engaksï na k’amarenga ji arhiasïrempka:

— “Nombema kurhangusïnga engajtsï ísï sarhasarhamejka”

Méntku úndaska ísï arhiani engaksï jamberi kurhangupka eska k’uanisïrempka jájki tarhatani ka erokorheni eska ma k’amarapiringa uandani ka tátsekua máteru uandania.

Kurhangutsperaspkachi eska uétarhexapka urheta sési jánskarantani jimboka uánekua ambe jima umbandikuxapka, ísï jámani uandaxespkachi eskachi iámenduecha jarhojpepiringa.

Niátakua arhukutsperani jámani uétarhespti ts’énskarani kóndekua ka arisïchi uandaxeraspka:

Ji (jurhendpiri) arhiaspka:

— “Ts’éntskara je ka méntkuenichani arhustatspera je.”

Sapichaksï ísku p’ajpa’nharisti ka nójtsïni ióndani kurhamarheni:
Heribertu (tataka sapichu ma):

— “¿andi inde néna ts’éretanhasïni maiestru?

Ji arisï mókukuni:

— “Jauaniru, chájtsï uékani no jurhendanhapkia engajtsï 5º japka”

No nema úspti.

Aianguaska néna ts’ératani… inde matematiceri ambestia…

Tsimaniksï no ambe ma úspti ka maruteruechaksï sóntku jarhojpespti. Iúmu tsimaniksï pakareraspti jarhojpeni (tanimu tatakecha ka t’amu nanakecha)
Arhijperaspkachi eska mintsikorhepiringa ne enga sóntku k’amarapiringa sési jánskantani enga xáni míndanhapka.

Engani ménderu uaxastantaapka Heribertu uénaspti uandakorheni:

— “¡Maiestru inde Luisï nombema ústi!

Uánekuaksï sarhasarhameni méntkueni uandantani:

— “Jo, ka imajtu ísï, ka imajtu ísï…”

Táchaniksï sarhasarhameni.

Ka ji arisï arhiaspkia:

— “Humbertunijkusïni kurangukuka jimboka ima jandiojku uandaska enga no iámenduecha uandanhani jápka ka kaxumbitku erokorhesti eskani ínskupiringa sésekua uandani.

Pínamastiksï, ka ji ménderu arisï kuramarheani:

— “¿Sési jaki ísï jámani eskaksï inde engaksï no k’amaraka ka máruksï jámberi no jarhojpeni? Ji exeaxapka… ¿Nochi ua uandaxeni ambe úkuaani imechani engaksï ísï ambema no úaka óksï támu ísï niátani?”

Uánekua ambeteruchi uandaxeska xarhati arhijkutperakuechani, sánhanichi kúndapani mándani pauani, karapaaskachi néna arhijkutperani imani salonirhu. Karapaskachi ambenga no sési japka úni ka ambe úpirini ne enga ísï niátapiringa.

Exespkachi ka ts’éjkuspkachi eska k’érati xukajperata jatsikuani sánderu no úsïrempka maiampetarani imani enga no sési niátenga. Ka arisï jásï ma karakata jairaspti:

Ne enga: Ima:


1. No uandajpeska janorini 1. No inchaati.
2. K’arhatsenda k’uanikuska incharini 2. Témbeni k’arhatsenda k’arhantaati
3. Kuirunharhitaska 3. Ma litru piantaati pintura
4. Mandicioni uandaska 4. Amambani juati ka aiangukuakachi
5. No janhanharhiska jurhentpirini 5. Uéraati ma hora
6. No juánguska tarea 6. No inchati
7. Ióndaska janoni (20 munutu) 7. No inchaati ima jurhiatekua
8. Inchajpataska uandani 8. 30 minutu uéraati
9. Nombema karaaka 9. Ixuchi xukarkorheaka (amamba)

• Na engani xáni ióndapka

Karakata ma uéxurhini jurhengueri urakorhespti ka indeni sési jajkunichi tanimu kutsï kámaspka, eska na uétarhepenga. Ménichi ma tsípa kamasïrempka májku nona sési pérani.

• Jurhengueri ts’éretanskua

 Exeska Néksï kaxumbeskia
 Náxaniksï kaxumbeski
 Ne sánderu no kaxumbeski
 Néksï no chésïni uandani
 Néksï chesïni uandani
 Ne uékasïni jurhentpeni
 Ne uékasïni eska jurhendanhaaka
 Ne uétarhenchaxaki eska jarhuatanhaaka

• Ambe úraski jurhengua ts’éretani jámani.

Jatsinharhikupaska mándani pauani ne enga uandajpenga ka ne enga no uandajpenga ka tsimandani kutsï aianguaska amambechani ka tátjembechani.

Eskani máteru ambe (namoni junhaski, ne ióndaski janoni, tereauechani...) indentuni jatsíkupaxapka engaksï sapicha xarhatenga jurhengorheni jarhani kaxumbekua.

• Úratakuecha

Íni jásï t’auakata jurhengua ka kaxumbekueri ambe jurhengua sánderu uandaxekuesïndi jimbosï no káni ambe uétarhejti úratakua. Síranda ka kararatarakua tepamu úraska ka xánku.

• Néna ts’éretakuaski jurhengua :

Engani aianguani jarhenga náxaniksï petakuxapi tsimandani kutsï, iámendu máteru jurhenguecheri, pájtamasïrempka sési ambe aiangujpekuani amamba ka tátjembechani ka imaksï eratsentani pakarasïrendi ka kurhamarhesïrendijtsïni andisïni no aiangujpekuaueni no sési úkua ambe ka ji arhiasïrempka eskani ji mintsikani jarhasïrempka eskaksï jimajku jurhiatechani noteru no kurhandirapiringia kaxumbeni, ka kurhamarheasïrempka eskaksï uandakukorhepiringa na xániksï exekorhesïrempka eskasï petakuspka. Ísï erangusïnga eskaksï sapihca ísï sánderu tsípekua jinguni jurhengorhenchasïrempka iámendu ambe.

• Tsimani uni jamani úkua: Ambe marhuasïni kaxumbeni

• Mintsikaxaka: Eskaksï sapicha jánhaskakorheka ambe ka nani marhuasïni kaxumbeni.

• Arini ambechi úspka:

Uandantskua ma aianguaska sapichani ka indeni uandantskuarhu inchaataspka enga jánhajka k’ératicha jefaturarhu pájperanhani. Enga jánhajka jurajkperanhani jimboka nanachi sapichu no uékasïnga sési ambe niátatspeni ka jima inchatakuaska eska jimbosï no úenga jimboka sapirini no kaxumbespka.

Engani na k’amarapkia uandantani indeni uandantskuani arisïchi ch’anaspka: iúmu nanaka sapirhatichaksï nánde jémberi jukantapirindi ka máteruksï iúmu nanaka sapirhaticha nanachi sapichueni jukantapirindi. Jarhojperasptiksï eranhaskani nanachini ka nánde jémbani ka nanachi sapichuni ka ísïksï juájtakorhespti xukutakua ka ísïksï xukuntaspti.

Iámenduechachi jánhastperaspka néna enga uétarhenga uandani, xéparini ambengeri jukantatini japiringa, ka na enga uétarhenga mókukorheni. Arhispkachi imani enga nanaka sapichueri jukantapka eska jángorhentapiringa uandakorheni eska imasï sési eratsejka, eska iásï ísïsï sési irekuekia, eska nóteru jatsiska uarhiti sapirhaticha kaxumbenhani ka eska no k’uanisïnga ambe niátatspeni jima enga uambuchaaka. Imani enga nánderi ambe jukantapiringa arhistakuspkachi eska ima arhijtsïkupiringa kaxumbekueri ambe enga ima k’éritini marhuakupiringa.

Engaksï na kéjpepka, ima enga nándepka no ambema arhisïrendi ka imajtu enga nanachi sapichuepka imajtu noambema arhisïrendi amambani ka noksï úspti uandaxeni.

T’uini exexapkia eskaksï máteru nanaka sapirhaticha atsïmenhentaxapka sóntku kéjpenchani. Engaksï jamberi k’amarapka, t’uini mítespkia néchani kéjpaani, ka no ióndaspka arisï arhiani:

— “Lupita, iasïrini t’u jarhuatakia”,
Ka ima Lupita no jarhani ióndani jiókorheni jukantani.

Tsimani úni jámani uinhamu úrhusptia, jimbokani máteru imani kéjpaspka enga sánderu sani kaxumbepka imao jurhengua p’itini. Ióniksï jatsijperaspti mámaru ambe arhijperani ka ísku úndani iámenduecha uékani inchakuni uandaxetarhu. Ji p’ímukuaasïrempka, arhiasïrempka eskaksï erokorhepiringa, eskani jucha k’amaratini uandapiringa juchari eratsekua. Engachi na uandaxentani jarhenga uánekua ambe úsïrempka pájtamani aianguani néna eskaksï jurhengorhepiringa kaxumbeni.

Sánhani arhispti uandaxeta imecheri jánguarhu ka irekuarhu niántani, nanaka sapirhatichaksï sánderu uandatsperantasïrendi ne no kaxumbekua jinguni jámasïreni ka ne sánderu xukanhasïreni arhistamenhani ka ne no xukanasïreni cheni jémbao. Ambankuksï ninharhisïrendi sapicha engaksï cheni jémbao no méni arhistamenhajka, imaksï sánderu tsípekua jinguni kurhaani jarhasïrendi ka kurhangorheni ambe. Catarinu (tataka sapichu ma) nombema kurhangorhesïrendi ka nójtu ambema uandani ka ima sánderu xarhatani jarhani jángua jimbo eska jurhengorhexapka kaxumbeni.

• Na engani xáni ióndapka

Xarhati ch’anakua jurhendajperakueri ma kutsï jimbochi ma úska. Ka indentuni jiajkani ma uéxurhini jurhengueri úska. Iúmu tanimujku, k’amarhuni jámani nóteru úkorhesptia jimbokachi sánderu clausureri k’uínchekua úskuni jámaxapkia.

• Jurhengueri ts’éretanskua ka jánhantskanskua.

 Engaksï xarhatani jápka kaxumbekueri kurhangukua
 Engaksï jurhengorheparini no chénga uandani
 Engaksï no uandenga
 Engaksï úrani uénapkia kaxumbekuani
 Engaksï no úrekenga jurhengua xarhatani.

• Ambe engani jimbo jánhaskataka na xániksï jurhegorhespia.

Kararapaaska engachi na k’amarenga ch’anani ka uandaxeni, arhiasïrempka eskaksï imani karantapiringa ambengaksï sánderu kurhaanchapka. Imaksï karasïrendi eskaksï xánku tsípekua jatsinga, imaksï tanimu sapicha (ma tataka ka tsimaniksï nanakecha) engaksï no úenga o engaksï no uékenga karani imajtuksï karasïrendi tsimani rengloni. Ima engaksï sánderu karengia sési, kánhachaniksï karasïrendi ka jima pájtamasïrempka exekuani ambe engaksï kueratanchani jápka jánhaskani karakueri ambe.

• Úratakuecha

 Tsimani k’uanindikua
 Iúmu sïrijtakua
 Uaxakatakua ka ma píjtsitakua
 Atanharhitarantskua

Tanimu úni jámani ukua: Xukajperata

• Mintsikaxaka: Eskaksï sapicha jandiojku jánhaskakorheaka eska xukajperata marhuatspesïnga.

• Arini ambechi úspka :

Aianguaaspka eskani ji ma xanhari no sési arhinhaspka xukanhani engani no uandajpaapka jucheti uauechani eskani ji ikiakorhespka ka eskarini k’éritini marhuachespka ima engani ji xukanhapka. Ka jimajkuni mándani arhispka kurhamarheani sapichani eskaksï uandantapiringa na jatiniksï xukanhaspi ka andi. Jimajkuni arhiaspka eskaksï karapiringa imani engajtsïni aiangupka. No ióndaspti mókukorheni Heribertu:

— “Ji no méni xukanhaska”

Ka ji arhini:

— “Ísïksï uandasïndi ne enga xépeni jarhajka karani jimbokachi iámenduecha xukanhasïnga. ¡Mirikurhiskiria eskakini uitsindekua xukaska!”

Noteruksï mókukorhespti ka p’irhipakurhistiksï kuadernu p’itakorheni.

Engaksï na k’amarapkia karani mámaru jásï marhuataspka karakatani: Jánhastaani naniksï tamisï karaspi, naniksï eratsekua utusïri o p’urheri inchaataxapi ka (jimbokaksï tanimu sánderu sani p’urhe jimbo karasïrempka). Arisï káaspka: Axaspka Martha Aliciani eska karanharhitapiringa pisarronirhu imeri karakatani. No uékasïrendi. Tátsekua uékasptia engani arhipka eska Guadalupejtu ma akandani karanharhitapiringa terujkani pisarronirhu imeri karakatani. Ma utusï jimbo karaspti ka ma p’urhe jimbo. Enga na karakata japkia, arhiaspka iámendu sapichani eskaksï arhintapiringa no mindsiraparini. Aiaakuaaspka eskani sési jatsikukuapiringa imani jurhiatekueri ne enga sánderu uánekua xékuntapiringa nani no sési karakata jarhaspi. Índeni úni jámani urhetani sésekua kurhakuaspka Martha Aliciani ka Lupeni eskajtsïni jiaretapiringa jarhuataani xékuani naniksï támisï karaspi ka imaksï tsípekua jinguni uékaspti.

Tátsekuachi úndaspkia uandaxentani andichisï xukanheni ka ne no xukanhasïreni. Míani pakaraska eska Lupe uandakuntaspa Maria del Socorroni, jingunekua jembani, eskanha cheni jémbao no méni xukanhasïrempka, ka eskanha noma ambe úranhasïsenga, ka eska ambe uéjki no sési uénga, o na uéjki mandisioni uandenga eska no nema xukasïrempka.

Uínhamu xukaspka, Luperi jinguninekuani aianguspka eska ísï no sési jarhaspka k’óruni jángorhentaska p’imukukorheni jimbokani míteska eska no sésiska uánekua japarini xukajpeni. Jángorhentaspka aianguni eska ima xáni kanekua xénchani jámanisï no xukanhenga, k’óru eska k’éritini uétarhenchapiringa.

Ángela, iurhitskiri ma enga témbeni ka t’ámu jatiripkia, uinhamu arhispti jánhastani eska no sési úmenhaxapka enga ísï nómbema arhistamenhani japka:

— “Sóco (nanaka sapichu enga no xukanhenga, Luperi jingunekua) t’uri no xénchanhasïnga jimboka ne enga chénijembao nómbema uranhajka ima no jurhengorhesïndi ambema niátani ka k’éritindi t’úsï surfiriuaka ijmboka nimoreska mama chári niuakia chéti achetini ambe úkuni engari na uambuchakia.”

Ménku ísï terekorhenhani. Asunciona ka Ampeliaksï no terekorhespti, ískuksï pakaraspti éjpu t’énhsatatini ka ji imechani arisï arhiaspka:

Ampeli ka t’u Asunciona, ¿Ambejtsï úski óksïni ne xukaski? Ka imaskï ísku manajtsïni ka nómbemaksï uandani. Erateaxapka ji eskaksï ima sánderu pákorhexapka indeni jurhengua.

Uandaxexapkachi útasteru enga jamberi Ampelia tarhatapka jajki uandakua kurahjkorheni:

— “Maiestru ¿Andi ma méro no xénchanhanisï nómbema úranhajki?

Ka ji kurhamarheaspka:

— “¿uéksïntsï eskaksïni aianguaaka xénchanhasïni o no xénchanhasïni?

Sapiicha:

— “¡Jo!”

Jurhentpiri (ji, Lázaro Márquez Joaquin) arhiaspka:

— “Aiaguakaksïni, k’órujtsïni asï jáma je inchajpatacheni engani ji uandani jauaka ka sésimendu kurhani ja je: Ísïsti eska Ángela na uandaka ne enga no xukanhajka ima no xénchanhasïndi. Chájku eranhaska je, engani ji Idaliani (iámenduksï mítetixapti eska Idalia jucheti nanaka sapichueska ka eska témbeni jatirispkia ka eska quintu jámaxaka íni jurhentperakuarhu) no xukapiringa enga ima ióndaaka niántani, enga kauini ka etsutani ambe jámani jauaka ka máteru ambeteru ka ji ískuni exeni jarhani. ¿Cha xésïnia eskani ji xénchasïnga engani nómbema arhijka? Ji xukasïnga jimbokani xénchasïnga, jimbokani uékasïnga eska ima jurhengorheaka ambe niátani, eska jurhengorheaka kurhandirani, eska k’éritini kaxumbeaka.”

Imani uandaxekuarhuksï sapicha kurhangorhespti xárhati ambeteru.
Ka erateaxapka eskaksï ima sapicha tsípexapka engaksï uandakorhentapka eskaksï no sési p’ikorherasïrempka engaksï uánekua ambe úranhajka ka engaksï kánekua úranhajka ka engaksï kánekua xukanhajka.

Máteru jurhiatekuechaniksï jámaspti táchani kurhangorheni ka ji uaxastasïrempka aianguaani, mítetaraani ka arhistakuani.

No karaska eskani jurhendaasïrempka jimboka, kaxumbekua jurhentpeni sánderu úkuaska eska uandakua, jimbokaksï sapicha exejpeparinisï jurhengorhejka.

• Na engani xáni ióndapka

Ma kutsï jimbo ma xanhari úskutixapka enga úpka sánderuchi uandaxesïrempka jimbokaksï sapicha kurhangorhepasïrempka.

• Jurhengueri ts’éretanskua ka jánhantskanskua.

 Ne enga chenijembao no meni xukanhenga
 Ne enga ikiakorhenga enga xukanhenga
 Ne enga úpka kurhanguni eska xukajpetata ka niátakua no ikiata jimboesïnga
 Ne enga tsípekua jinguni uékenga eska xukanhapiringa

• Ambe engani jimbo jánhaskataka na xániksï jurhegorhespia

 Exeaska ka jánhaskaska náxaniksï úxaki jurhengorheni xukajperateri ka karantaska.
 Kurhamukuaska eskaksï marhuataxaka xukajperatani.
 Aiangustijtsïni amambecha eskaksï sapicha uandakorheska eskaksï xukanhapinga.

• Úratakuecha

 Kararatarakua
 Uandakua
 Uaxakatakuecha

TANIMU ARHUJTATA. UANDAXEKUERI TANHORAKUA.

Urheta uétarhesïndi sési kurhanguni eska Educación Cívica no asignatureska ka kaxumbekuani no úati arhini eskachi támu jupikaka indenku jurhentpeni jimboka uánekua jurhenguarhu pájtamakorhesïnga. Sánderu sani kurhangukukuesti eska kaxumbekua irekueska:

“…podemos definir serenamente la educación cívica como <."

Enga nema uénaaka sapicheri kurhanguakua uinhaperakueri uandaxeni, no ukorhesti no uandatseni Jean Piagethini ka Vygotskyni ka uétarhesïndi kurhanguakukuani. Tsimarheniksï uandasïndi eska jurhengua no imasï exekueka néna enga k’amarajka, eskanha imasï exekueka néna enga jámapajka nóna jurhengorheni, eranhaska je: Nónha imasï exekueti néna enga k’amaraka San Juanueri k’uinchekua, (ixu iretarhu Ch’eranijajtsïkurini k’éri k’uinchekuksï úntasïndi sapicha ka tumbicha) imanhasï exekueti nénaksï jámaski sapicha ka tumbicha tanimu ka t’ámu kutsï jamberi k’uinchekua úskuni:

“Piaget se opone a las corrientes epistemológicas que consideran al conocimiento como un estado, es decir, como algo dado, acabado, en el cual se cre que la ciencia cuenta con verdades absolutas. Afirmar que el conocimiento es un proceso implica reconocerlo como algo en construcción permanente, fruto de la interacción del sujeto con el objeto de conocimiento”.

“La palabra <> es esencial para entender la teoría de Vygotsky (1978, pag. 64). El siguiente fragmento así lo explicita: <<… necesitamos concentrarnos en los procesos a traves de los cuales se establecen las formas superiores y no en el producto del desarrollo. Esos procesos son sociales en su origen y en su naturaleza, y son específicamente humanos>>”.

Piaget ka Vigotskiksï terukutasïndi indeni jimbo, eska jurhengua kújtsïkupasïnga ka eska jurhengua jimasï úkorhepajka enga sapi máteruechani jinguni ch’anaaka o eska na k’épaaka, máteru ambe jimboksïsï no terukutajti.

Vygotsky uandasïndi eska sapi ísï jurhengorhepasïnga eska na jurhengorhepajka uandani ka eska na exejpepajka, ka kaxumbekueri jurhengua indeni terukuntasïndi, enga úka, Pigethi jurhenguani jimajku erangusïndi eska na uénajka úkorheni ka eska na kánekupajka táchani sapiri éjpurhu. Piagethiri eratsekua kararichaksï uandasïndi eska inde jarhuajpiriska jurhegueri, eska no jurhengueri ambe mítekutiska ka eska no psicologueska eska epistemólogueska. Jimboksïsï uánekua ambe terukutajti jimbokaksï tsimarheni kurhangukueri ka jurhengueri karariska.

Indeni achamasïcheri eratsekua chúngumani uétarhesïndi jirinhakuntani néna uandaxekuani sapichani, terukukuani engaksï sapicha jatirikua jimbo únhchani jarhajka, kurhanguni eskaksï sapicha imani sánderu jurhengorhesïnga engaksï exeni jarhajka, ka no imanku engaksï arhijtsïkunhani jarhajka. Ambe engachi exerauaka úkua jimbo sapichaksï imani sánderu jurhengorhesïndi. Engachi k’ératicha uénaaka nánditerkueni uandaxeni indeksï ísï jurhengorhesïndi, ka méntkueni iámendu ambe néna engaksï eranhekua p’itani jauaka ísïksï pakatasïndi imecheri jurhengueri pitsekua.

Indeni jimbosïni imani eratsekuani p’erarhejka enga arhijka eska jurhengua máteru jurhenguani pitsetini kánepasïnga (ZDP) ka indeni exesïnga eskachi jurhentpiricha jatsika eratsentani jimboka néna engachi jókukuaska pítsekua sapicheri jurhenguani ísïksï chuperaati jurhenguani.

Juchaari sapi p’urhecheri eratsentani indeni ambe kánekua ts’unhapesti, jimboka jurhengua tátjemba ka amamba jinguni jarhaska ka sánderia kaxumbekueri ambe. Eskani uénani jámani na karakia, náki enga sapi tátjemba ka amamba jinguni t’arhexeni jaka imaksïsï jurhengorheni jati kasïkasïsï jámani, ka uandajpeni, ka no nánditerkueni jámani, no uanonhaskajpeni, ka inde ambesï jindetia kaxumbeni.


Vygotsky uandasïndi eska “k’uanisïnga urheta uandakuani jimbo sési terukutsperani sapichani jinguni”, jimbosïni arhijka eska uétarhesïnga p’urhe uandakua úrani kaxumbekua jurhentpeni jámani:

“El lenguaje y los demás sistemas de signos son dominios culturalmente construidos, el sistema numérico y el lenguaje son comunicados al niño desde la temprana infancia. Después los niños transforman esos sistemas y actuan sobre ellos, empleandolos para mediar en sus actividades cognitivas. El empleo del lenguaje en concreto, ayuda al niño a alcanzar con éxito objetivos, bien de forma directa, atraves de la autorregulación verbal, o de forma indirecta, pidiendo ayuda a otra persona (la cual puede a su vez ofrecer esa ayuda directa o indirectamente)”.

Nóksï úsïndi sapicha kurhanguni enga utusï jimbo uandaxekuaka jimbokaksï no úsïnga úrani uandakuani eratsetarantani ka kurhangorhetarani.

Sapichaksï jurhenguechani kángorheani jarhasïndia, nóksï nómbema mítetini niárasïndi jurhenguarhu, ka ima jurhengua p’urhe jimbo jurhendakatesïndi ka p’urheri ambesïndi, ka indeni jurhenguechaniksïsï k’érati mítekuti jurhengueri arhijti eska pitsekuesïnga jurhengueri.

Engachi p’urhe jimbo jurhendajpeska sapi sesi p’ikorheraati, ka xénchakata pi’korheraati, ka tsípekua jinguni kurhangorheati ambenga no jánhaskaaka.

Jean Piagethi karasti eskaksï ma parhakpeni sapicha iámendu méntkueni járhaska, eskaksï méntkueni jurhengorhepiringa enga méntkueni arhistamenhapiringa, ka ísïsti, enga úka, juchari sapi p’urhechaksï sánderu kánekua chénjembao jurhengorhesïndi ka imajtu kánekua uinhapesti engaksï iretarhu exejpeparini jurhengorhejka.

¿Néna xerentani indeni jurhengua? Sapichu uénasïndi p’urheri kústakua kústamenhani ka piremenhani. Jiminiksïsï no méntkueni jáxetia máteru sapichani jinguni. Jútkiru je terukutani sapi p’urhe sapi gringu ma jiguni: P’urhe tembuchakua úni ch’ananhchaati uánekuechani jinguni ka gringu jandiojku ch’ananhchaati imeri ch’naratakua jingunijku. Ísï ambe jimboksïsï juchari sapi p’urhecha ménderueni jurhengorhejti.

Vygotsky karasti eskaksï sapicha jurhenguarhu imanisï sóntku patsakorhejka ambe engaksï exeni jauaka ka isïksïnha ts’ïrirapasïndi jurhenguani.

No sési xekatesti enga jurhentpiri pirimu jupikatini jurhendajpejka o enga sapichani uinhachakuajka; indeni jásï jurhentperakua uétarhesïndi mirikurhinia ka jirinhakuntani nénaksï sapicha úa juchantsïni jinguni tsípekua jinguni uandaxeni. Sapichaksï máru cheni jémbao no sési kánhasïndi ka jimboksï no úni jarhasïndi jurhengorheni ka jimbosï no sési jati ménderu jucha jurhentpiricha no sési arhitspeani.

Juchachi p’urhecha, p’indekua jimbo, sapichani ataparini “jurhendasïnga” ka no nema no sési xésïndi. Enga sapi no kaxumbiti jaiarani jarhajka jucheti pirenchichaksï uandasïndi:

— “¡Atachka!, nóchkari no atasïni andi jimbokinisï ísï mókuchejti ka jimbosï ísï no kurhandirajti.” Ka íni jurhiatekuechani nóteru sésitia eskaksï sapicha ataparini ka uinhachaparini jurhendanhaka:

“…En resumen los diez pricipios de los derechos D. U. de los D. del N. son:
VI. Derecho a comprensión y amor por parte de los padres y la sociedad
VI. Derecho a recibir educación gratuita y disfrutar de los juegos…”

Úpiringachi uánekua ambeteru karani enga sapichani kuajpeajka eskaksï sési kánhaka ka juchachi p’urhecha útasï nótki úxaka kurhanguni jimbokaksï jurhenguarhu nanecha niárasïnga ka uandaniksï eskachi atakuauaka sapichani engaksï no kurhandirani jauaka ka enga no úni jauaka jurhengorheni.

Kaxumbekuarhu niántasïndi jurhenani no uinhachaparini jurhentpeni ka jimbosïni uéjka jucheti jurhengorherichani p’ikorherakuani kurhanguni, ka inde no arisku ambesti, ísï jámani úaka jurhendatspeani kaxumbekua.

Úpiringa kánekuateruni karani enga xáni ójkutani jaka kaxumbekua jurhenguani ka eskani imani exeparini erakuska kaxumbekueri karani. Máterkuni uékasïnga eskajtsï exeaka néna engaksï eratseni jaka ka na engaksï xáni uandanhe.