JARHOJPENI, NO KAUINI
Lázaro Márquez Joaquín karasti
12:55 Lunes 28 de diciembre de 2009
Tanimu jurhia tátsekua enga Idalia karakorhepka
(Civil jimbo uanbuchani)


Mámarhu ambe nósesisti kauicheni, ásï méni jáma je kauicha úkorheni, enga úka, no xénhperani ka ikiatsperani kámberani márkueparini, sánderu nósesisti eska kauicheni. Ka ekari kauikua no uékani pímuni jámani, chéti márkuechani jarharetakorheani jaka, inde sánderu nósesisti eska jarhojpekuarhu sáni arhani, no kauini.

Ekari kaxumbiti eratakorhejkia ka arhinchpeni jarhani enga jarhojpekuarhu anhajka, ísku amberisï uandani jaka, nóri uékani pámbetpeniaru.

Imasï kauicheti enga támu atsïkorhejka, enga semana jatantajka kauini jámani, o enga na jarhojpekua k’amarajkia ka ima támu nirani andangutani.

Ji no kauicheska, ji jarhojpexamka, ji jarhojpekua jatsiska, no kauicheska ka no kauiaka, pámbetpeaka ka tsípexaka engajtsïni pámbetani jaka, jimbokani jimini p’ikuarherasïnga eskajtsïni xénhchasïnga ka uéksïngaksïni xarhatacheni eskaksïni jítuni xénhchasïnga.

Ambe sésiski kaxumbekua uandaparini jámani ka no uékani jarhojpeni ka no uékani pámbetpeni.

Ji imanisïni sési xéjka enga k’áni p’ikuni uénaaka jarhojpeni, enga iuitspeaka, ka jimajku piiuni enga jápu p’ikuranhaaka, enga jarhojpeaka chkari japu p’ikuni, jarhojpeni jápu uarhomani, úrhurani nirani, k’urhunda p’amantani, jarhojpeni echuskuani, eka jupanhataranhantaaka, jupanhantani, enga iámendu ambe tarhamerheaka patsatspeni ka eka ánchperata úranhaaka, ánchperata úni, eka jéndanhaaka jéngorheni ka tátsekua eka uarharanhaaka, uarhanchka, ambe úski andi… eka kauiranhaaka, marhuatani, k’óru nóchka kauini, néna jámantsï kurhangua eska no májkueniska kauicheni ka jarhojpekurhu pámbetpeni, jarhojpenirisï auaka, no kauini.

Ne enga kauicha o kauikua p’amenchakua kámka, sóntku ambakenteia, ásteru aueia, sapichaksï k’arhimaxati, uarhiti uandanheaxati ka iámendu imeri márkuechaksï uandanheaxati engari xáni ísï makujka kauini, ka jimboka eka jarhojpekua jauaka, ísïri no jamberi úaka jarhojpeni, jimbokari chéti kauichekua jimbo nani p’iua tumina engari jarhojpetaraaka.

Arhanchka! Arhaniru, k’óru sésichaka, no kauicheni makuni, kánekua arhani ká materuntu uékani pájtamani kánekua íntskuni, uékani eska máterujtu méntkueni tsînchentaaka kauini, sési makuniaru ka jiántku enga k’uaniaka ka no iauani chúrekua jamberi, nóri nóna petanhantani jarhani jima enga kuataranhatini janhaakia jarhojpekuarhu. Ka nójtu jámani xarheni níntani k’ámaraniaru uarhani eska xáni kústakua sáni kasïperani jauaka, no xáni chúrekua jamberi… séskueniaru. Imaksïsï sánderu uarhanhchani jarhajti engaksï nóteru jarhojpekua jimbo pakarani jarhajkia, imaksïsï uinhanhaskpeni jarhajti sánderu kústakua uékani engaksï kauikua p’amenchakua p’irani jarhajkia.

Ásï nósesi kaui, inde p’amenchakuesti, ásï jarhojpekuarhu uarhipe, indejtu p’ánchekuastia, ásteru aia, jimboka máteru jarhojpekua janonguaxatiia.