Jucha p’urheecha eróantasïnka ánimeechani mándani uéxurhini, sapirhatiichanksï máruechani pirékua jinkuni eroántasïnka ka iáminduechanksï jatsíkukuasïnka uatsákukua, enkaksï pirírantajka ka enkajchi kéjtsitakuajka kurhínda, purhú, apupú, tiríapu, xaníni, enándi, naráxe , itsï, ka máteru amanenchakuechani asukarueri úkata, tixatakuasïnkaksï kandéla ka jatsíkukuasïnkaksï tirínkini tsïtsïki ka k’uirítsu.

Enka ma k’uirípu imani uéxurhiri jimbo uarhíjka, k’umáchikuarhu únasinti t’irekua ka lakatamale, munuelasï ka máru iretecharhu k’urhúnda ka churhípu jinguni t’irérpesïndi.

Iámindu kéjtsitakua uánekua ampe arhíkuekasïndi, ísïksï uandasindi acháati k’ératiicha ka uarhíitiicha eska kéjtsitakuecharhu ménku jauaka: itsï, echéri, tarhéata ka ch'jpíri. Jimbokaksïna ánimeecha itsï ménku uétarhinchasindiksï pariksï pákuarhini ka enkaksï xanháru isi k’arhíchaaka eskaksï nómeni kuerátanchaaka itsï.

Iámentu akua amanenchakua, enándi, naráxe, apúpu, xaníni, kurhínda, indeksï jindéesti t’irékua enkajtsïni Tatá Kuerájperi íntskujka ka enga echérirhu uérajka ka enga echérirhu k’uirípejka. Isïtu kandeleecha ka k’uiritsu jindeestiksï Tata Diosï Kurhíkuaeri t’irékua enkajtu intsïnharhitanajka jucháari urhétakua anapu Tata Diosïni.

Enga ma iurhítskiri erónantaaka o ma tumpini o ma sapini, méenichanksï pirékua jinguni eroántasïndi, jimbokaksï no tembuchatini uarhísïnga ka ánimeecha jimboksi junguasïnti pariksï tembuchani. Má jurhítekua inchámani eróantasïngaksï sapíichani, tumbí ka maríka no ambé tembúchatiichani ka paúandemakua k'eratiichani, tembúchatiichani ka tatá ka naná k'eratiichani, ka tanímu jurhiatekua jimbó iámendu ne nirásïndi kampo sánturhu.

Máru japóndarhu anapu iréteecha ka ómekuecha, chúrekua jimpo nirasïnti kampo santurhu ánimeechani k’ejtsitakuani ka uatsákukua jatsikukuani, kandela tixátakuani ka eranskutasïndiksï pámpeani.

Ka tsïmá juchéeno anápuecha isï úsïndi junguani mandani úexurhini, enga jucha isï no meni jurájkujka indéni juchári jakájkukuani, ka isïtu enga xáni k'uiripu no újka jakájkuni sïmóecha anápucha no uáti junguani. Isïjtu no sesï ambéesti kéjtsïtakua jatsíni o úni engaksï noneni eróntani jaúaka...

_________________
Un escrito de la página: Facebook.com/santafe.laguna